mk Logo

കൊച്ചി: മുഖ്യമന്ത്രിയുടെ മകൾ വീണാ വിജയനെതിരായ മാസപ്പടി കേസിൽ വിജിലൻസ് അന്വേഷണം ആവശ്യപ്പെട്ടുള്ള ഹർജി കേരള ഹൈക്കോടതി തള്ളി. കോൺഗ്രസ് നേതാവ് മാത്യു കുഴൽനാടനും വിവരാവകാശ പ്രവര്‍ത്തകനായ കളമശ്ശേരി സ്വദേശി അന്തരിച്ച ഗിരീഷ് ബാബുവും സമർപ്പിച്ച റിവിഷൻ ഹർജികളാണ് കോടതി തള്ളിയത്. ജസ്റ്റിസ് കെ. ബാബുവാണ് വിധി പുറപ്പെടുവിച്ചത്. ഹർജിക്കാരുടെ വാദമനുസരിച്ച്, വീണ വിജയന്റെ കമ്പനി എക്സാലോജിക്കും കൊച്ചിയിലെ കരിമണൽ ഖനന കമ്പനിയായ സിഎംആർഎല്ലിനും ഇടയിൽ നടന്ന സാമ്പത്തിക ഇടപാട് വിജിലൻസ് അന്വേഷിക്കണമെന്ന ആവശ്യം കോടതിയിൽ ഉന്നയിച്ചിരുന്നു. ആദായനികുതി സെറ്റിൽമെന്റ് ബോർഡിന്റെ കണ്ടെത്തലനുസരിച്ച്, സോഫ്റ്റ്‌വെയർ സേവനങ്ങൾ നൽകിയെന്ന പേരിൽ എക്സാലോജിക് കമ്പനിയ്ക്ക് സിഎംആർഎല്ലിൽ നിന്ന് 1.72 കോടി രൂപ ലഭിച്ചെന്നതാണ് വിവാദത്തിന് കാരണമായത്. ഇതിനെ തുടർന്ന് എൻഫോഴ്‌സ്‌മെന്റ് ഡയറക്ടറേറ്റ് (ഇഡി) കള്ളപ്പണം തടയൽ നിയമപ്രകാരം അന്വേഷണം നടത്തിയിരുന്നു. മാസപ്പടി കേസിൽ മൂവാറ്റുപുഴ വിജിലൻസ് കോടതി നേരത്തെ ഹർജി തള്ളിയിരുന്നു, ഇതിനെതിരെ ഹൈക്കോടതിയിൽ റിവിഷൻ ഹർജി നൽകുകയായിരുന്നു. ജനുവരി മാസത്തിൽ, സിഎംആർഎല്ലുമായി ബന്ധപ്പെട്ട 185 കോടി രൂപയുടെ അഴിമതി ആരോപണത്തിൽ കേന്ദ്ര സർക്കാർ ഡൽഹി ഹൈക്കോടതിയിൽ റിപ്പോർട്ട് സമർപ്പിച്ചിരുന്നു. ഇത് എസ്‌എഫ്‌ഐഒ (സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ്) - ആദായനികുതി വകുപ്പുകളുടെ അന്വേഷണത്തെ അടിസ്ഥാനമാക്കിയുള്ളതാണെന്നും റിപ്പോർട്ട് വ്യക്തമാക്കുന്നു.